7 Pleie og omsorg

Ramme 7 omfattar einingane Valderøy omsorgsdistrikt, Vigra, Giske og Godøy omsorgsdistrikt og eining Meistring og psykisk helse.

Einingane yter tenester heimla i helse- og omsorgstenestelova.

Giske kommune har tre omsorgssenter. Giske omsorgssenter (37 heildøgnsplassar) , Vigra omsorgssenter (21 heildøgnsplassar) og Godøy og Alnes bukollektiv (12 heildøgnsplassar). Alle driv bukollektiv-drift med unntak av 8 institusjonsplassar ved Vigra omsorgssenter. Den største tenesta vår er heimebasert teneste som blir gitt både i bukollektiv og i heim til brukar. Vi har eige storkjøkken som leverer gode og effektive tenester både til omsorgssenter, til eigen heim, møtemat og liknande. Giske kommune har bufellesskap til menneske med utfordringar innan psykisk helse og rus (Løkevegen, 10 heildøgnsplassar), og bufellesskap til mennesker med nedsett funksjonsevne, (Gudmundvegen, Skomakarvegen, Reset, med til saman 15 heildøgnsplassar) og dagtilbod (Kingelveven) til mennesker med nedsett funksjonsevne. Vi har dagtilbod ved Giske omsorgssenter og dagtilbod for demente ved Vigra omsorgssenter.

Helse- og omsorg har omorganisert tenestene etter kvart ein har sett det nødvendig. Den siste store omorganiseringa var i 2018 der vi mellom anna samla rus-tenesta og psykisk helse i same eining. Denne endringa er viktig og nødvendig for rett utvikling, koordinering og samhandling, og for å møte veksten og utfordringane innan området. Velferdsteknologi og kvardagsrehabilitering er satsingsområder innan omsorg, og vi har arbeidd med dette sidan 2015. Dette er ei nødvendig omlegging i tenestene for å møte framtida sine utfordringar. Velferdsteknologi gir meir effektiv bruk av ressursane, gir betre tenester til eldre som bur heime, brukarar ved omsorgssenter, brukarar innan rus og psykisk helse og personar med nedsett funksjonsevne. Giske kommune deltek i Nasjonalt velferdsteknologiprogram . Frå 2020 vart det krav til kommunane at velferdsteknologi er integrert i helse- og omsorgstenestene.

Tenestene er opptatt av utvikling, kvalitetsforbetring, best ressursutnytting og tverrfagleg samarbeid. Tenestene har hatt ei markant auke i tal brukarar dei siste fem åra (sjå tabell under). Dette er ei utvikling som vil halde fram. Vi må jobbe smartare, endre arbeidsmåtar, justere struktur, nytte ressursane effektivt og vidareutvikle digitale og teknologiske verktøy. Det er ei auka forventning hjå innbyggjarane til kommunal tenesteyting. Dette, i lag med vekst innan pleie og omsorg, vil gjere det ekstra utfordrande i tida framover.

Årsak til auka frå budsjett 2021 til 2022 med kr 10 mill, skuldast auke i Brukarstyrt personleg assistent (BPA) med om lag 2,2 mill, redusert inntekt innan ressurskrevjande tenester med om lag 4,3 mill og auka behov hjå eksisterande brukarar og nye brukarar med ressurskrevande tenester med kr 5,2 mill. Reduksjonen i inntekter ligg til at nokre brukarar fell utanfor refusjonsgrunnlaget og vi har ressurskrevjande brukar som fyller 67 år. Det er lagt inn ei auke i budsjett til utskrivingsklare brukarar hjå helseføretaket, då vi dei siste tre åra har hatt meirforbruk innan området. Det er lagt inn løns- og prisvekst.

Refusjon ressurskrevjande tenester er i 2022 budsjettert til kr 29,5 millionar for 23 brukarar. I forslag til statsbudsjett for 2021 er refusjonsgrensa auka med kr 50 000 meir enn lønnsauke. Denne auken har kommunen ikkje budsjettert med da det er usikkert om det blir vedtatt i Stortinget. Om det blir vedtatt vil dette redusere budsjettert refusjon for 2022 med kr 1,1 million og 3 brukarar vil ikkje lenger være omfatta av refusjonsordninga.

Tabell under viser at Giske kommune sitt utgiftsbehov innan pleie og omsorg knytt til demografi, vil auke med 30 % dei neste 8 åra. Dette skjer om vi ikkje set i verk tiltak. Frå 2020 til 2040 vil behov for pleie- og omsorgstenester auke med 90 %. (KS)

Strategi bu-og tenestetilbod helse og omsorg 2050, kan vise seg å vere heilt avgjerdande for å møte veksten og utviklinga innan helse og omsorg. Mål om vedtak i saka i første kvartal 2022. Denne skal vidare inngå i arbeidet med samfunnsdelen og arealdelen i kommuneplanen.

Driftstiltak 2022, innan ramme 7:

• Leanprosessar og nye turnusar, kutt kr 2 mill
• Tilpassing til ramme, effektivisering, kutt kr 3,6 mill.

• Strategi bu- og tenestetilbod helse og omsorg 2050. Mål om vedtak i kommunestyre våren 2022.
• Fokus på tidleg innsats, lavterskeltilbod, der vi effektiv når mange. Unngå eller utsette behov for omsorgstenester
• Samarbeid på tvers, mellom tenester og einingar
• Auke bruk av velferdsteknologi, sjølvhjelpsverkty, digitale løysingar
• Auke bruk av kvardagsrehabilitering
• Leve heile livet, aktivitet og fellesskap.
• Kommune 3.0. Styrke samarbeid med frivillegsentralen og NAV.
• Vidareutvikle dagtilboda
• Omstilling av heimebaserte tenester
• Prosjekt VINN-VINN, fokus på sjukefråvær, rekruttering, kompetanse, arbeidsmiljø, heiltidskultur, turnus.
• Spisse oppgåvene til dei ulike yrkesgruppene. Service-vertar, aktivitetsvertar, assistentar
• Fortsetje å søkje tilskot/midlar til utviklingsarbeid og styrking av tenestene

• Den økonomiske situasjonen gjer det vanskeleg å yte lovpålagde tenester. Nivået på tenestene vert kontinuerleg vurdert.
• Lav grunnbemanning i tenestene gjer at vi står i fare for å ikkje klare å levere nødvendig helsehjelp. Auka sjukefråvær og vanskeleg å rekruttere til stillingane er konsekvensar vi ser i dag.
• Det er ei auke i tal barn og unge med særlege behov. Det er kartlagt om lag 50 barn med ulike utfordringar som vil trenge bu- og tenestetilbod innan ei viss tid. Rapport Det er vanskeleg å planlegge då vi ikkje veit kor tid hjelpebehovet slår inn.
• Risikoen for nye brukarstyret personleg assistent-brukarar, auka behov for avlastning og tenester til menneske med nedsett funksjonsevne er stor. Behovet er svært lite føreseieleg og vanskeleg å planlegge for, då brukarane kan kome på kort varsel og kan ha behov for store ressursar. Innan omsorg er dette den største økonomiske risikoen. Frå rekneskap 2019 til budsjett 2021 er det ei auke med kr 25 518 000.
• Auke i tal demente. I snitt er det registrert 53 nye brukarar i året sidan 2016. Rapport Det nye dagtilbodet for demente ved Vigra omsorgssenter, etablert september 2019, er eit viktig tiltak for å møte veksten. Dette vart også ei lovpålagd teneste frå 2020.
• Tal på brukarar innan helse- og omsorgstenestene har auka med 446 i perioden 2014 til 2020. Det er nærmast ei dobling av tal brukarar.
• Vi må ta i mot utskrivingsklare brukarar ved helseføretaket. Både 2019 og 2020 vart det meirforbruk på om lag kr 400 000. Per sep 2021 har vi eit meirforbruk på kr 200 000. Grunna auka behov i befolkninga for heildøgnsplassar, ventar vi at utfordringa vil halde fram.
• Oppgåveoverføringar frå helseføretaket gjer at brukarane kjem tidlegare heim og er dårlegare enn før. Vi må i større grad yte spesialiserte tenester innan somatikk, psykiatri og rus.
• Rekruttering av helsepersonell, særleg sjukepleiarar og vernepleiarar, og rekruttering av gode leiarar er spesielt utfordrande.
• Velferdsteknologi og kvardagsrehabilitering, implementere og ta desse i bruk.
• Auka press på avlastningstenesta og korttid- og langtidsplassar.
• Auka behov for fleire heildøgnsplassar, bu-og tenestetilbod til menneske med nedsett funksjonsevne og barn og unge med særlege behov.
• Stor auke i tal på brukarar innan psykisk helse og rus-tenesta, Vi ser verknadar av pandemien. Grunna lav bemanning er det stor risiko for at vi ikkje klarer å yte lovpålagte oppgåver.