7 Pleie og omsorg

Ramme 7 omfattar einingane Valderøy omsorgsdistrikt, Vigra, Giske og Godøy omsorgsdistrikt og eining Meistring og psykisk helse. Einingane yter tenester heimla i helse- og omsorgstenestelova.

Giske kommune har tre omsorgssenter, Giske omsorgssenter, Vigra omsorgssenter og Godøy bukollektiv. Alle driv bukollektiv-drift, i tillegg har vi institusjonsdrift i 8 plassar ved Vigra omsorgssenter. Den største tenesta vår er heimebasert teneste som vert gitt både i bukollektiv og i heimane. Vi har eige storkjøkken som leverer gode og effektive tenester både til omsorgssenter, til eigen heim, møtemat og liknande. Giske kommune har bufellesskap til menneske med utfordringar innan psykiatri og rus, og bufellesskap og dagtilbod til dei med nedsett funksjonsevne. Helse- og omsorgstenestene vart omorganisert i 2018 og vi samla mellom anna rus-tenesta og psykisk helse i same eining. Denne endringa er viktig og nødvendig for rett utvikling, koordinering og samhandling, og for å møte veksten og utfordringane innan området. Velferdsteknologi og kvardagsrehabilitering er to av dei største satsingsområda, og vi har arbeidd med dette i 4-5 år, ei heilt nødvendig omlegging i tenestene for å møte framtida sine utfordringar. Velferdsteknologi gir meir effektiv bruk av ressursane, gir betre tenester til eldre som bur heime, brukarar ved omsorgssenter, brukarar innan rus og psykisk helse og personar med nedsett funksjonsevne. Giske kommune deltek i Nasjonalt velferdsteknologiprogram . Det er krav til kommunane at velferdsteknologi er ein del av helse- og omsorgstenestene frå 2020.

Vi er svært opptatt av kvalitetsforbetring og nytte ressursane på best mogleg måte. Samarbeid på tvers har stort fokus. Tenestene har hatt ei markant auke i tal brukarar dei siste fem åra (sjå tabell under), dette er ei utvikling som vil halde fram. Vi må jobbe smart, endre arbeidsmåtar, justere struktur, utnytte ressursane effektivt, nytte digitale og teknologiske verktøy. Det er auka forventningar til tenestene hjå innbyggjarane, noko som kan vere utfordrande for kommunen å handtere. Omsorgstenestene kom på 15. plass på kommunebarometeret i 2018, noko som viser at vi leverer gode og svært kostnadseffektive tenester. Årsak til auka i budsjett 2020 med kr 8,1 mill skuldast behov for ressurskrevande tenester til nye brukarar, lønnsauke til sjukepleiarar i sentrale forhandlingar, generell lønnsauke og auke med to årsverk i natt-tenesta. Dagtilbod for demente og psykolog er lovpålagt frå 2020, og samla midlar på kr 855 000 er lagt inn i ramma til kommunen. Opptrappingsplan for rus held fram i 2020, og om lag 150 000 er lagt inn som frie inntekter. Samla bidreg desse til ei auke i budsjettet på kr 1 mill. Tildelingskontoret, flyktningtenesta og introduksjonsordninga er flytta til ramme 6 frå 2020. Budsjettet til desse følgjer med over, utgjer om lag 8 mill.

• Den økonomiske situasjonen gjer det vanskeleg å gi lovpålagde tenester.
• Kutt og lav grunnbemanning i tenestene gjer at vi står i fare for å ikkje klare å levere nødvendig helsehjelp.
• Det er ei auke i tal barn og unge med spesielle behov. Det er kartlagt om lag 50 barn med ulike utfordringar som vil trenge bu og tenestetilbod innan ei viss tid.
• Risikoen for meirforbruk innan tenesta avlastning og tenester til menneske med nedsett funksjonsevne er stor. Behovet er svært uforutsigbar og vanskeleg å planlegge for då brukarane kan kome på kort varsle og kan ha behov for store ressursar.
• Auke i tal demente. I snitt er det registrert 53 nye brukarar i året sidan 2016. Det nye dagtilbodet ved Vigra omsorgssenter er eit viktig tiltak for å møte veksten.
• Tal brukarar innan helse og omsorgstenestene har auka med 347 i perioden 2016 til 2018.
• Vi må ta imot utskrivingsklare brukarar ved helseføretaket. Rekneskapen frå 2018 viser eit mindreforbruk i høve budsjett på kr 49 500. Rekneskapen frå september 2019 viser eit meirforbruk på kr 439 000.
• Redusert tal heildøgnsplassar ved Giske omsorgssenter (5 senger) gjer at risikoen for meirforbruk er stor, og knytt til risiko for overliggande pasientar ved helseføretaket og auka belastning i heimebaserte tenester.
• Oppgåveoverføringar frå helseføretaket, gjer at brukarane kjem tidlegare heim og er dårlegare enn før. Vi må i større grad gi spesialiserte tenester innan somatikk, psykiatri og rus.
• Rekruttering av helsepersonell, særlig sjukepleiarar og vernepleiarar er utfordrande i tillegg til rekruttering av gode leiarar.
• Velferdsteknologi, implementere og ta denne i bruk.
• Auka press på avlastningstenesta, korttid- og langtidsplassar. Risiko for auka venteliste på heildøgnsplass er stor.
• Sto auke i tal brukarar innan psykisk helse og rus-tenesta med om lag 70% sidan 2016. Grunna kutt i tenesta er det stor risiko for at vi ikkje klarer å yte pålagte oppgåver.