3.1 Samfunnsutvikling
Befolkningsutvikling med framskrivingar
Giske er ei «omvendt» kommune både når vi samanliknar oss med kommunane i fylket og i landet elles. Vi har hatt ei stor tilflytting dei siste åra, og vi har ei forholdsvis ung befolkning slik tabellane syner. I fylkessamanheng er vi den kommunen som har størst innbyggarvekst dei siste 10 åra.
Befolkningsframskriving dei neste 10 åra
Grafisk befolkingsauke med relativ samanlikning mot landet
Framskriving med aldersgrupper
Prosentvis samla befolkningsendring 2019-2025
| 0 | 1-5 | 6-12 | 13-15 | 16-19 | 20-44 | 45-66 | 67-79 | 80-89 | 90+ |
|---|---|---|---|---|---|---|---|---|---|
| 8,25 % | -11,84 % | 7,11 % | 2,73 % | 13,02 % | 7,39 % | 3,98 % | 22,92 % | 23,02 % | 26,23 % |
Det er stort fokus på eldrebølga som slår inn over oss, og at denne er kostnadskrevjande. Vi ser ei stor auke i tal på personar med demens-liding. Dei siste åra har godt over 50 personar fått diagonsen demens årleg. Dette gir nye utfordringar i framtidsbildet vårt, og gjer at vi må arbeide vidare med tilrettelegging av tenester i heimen, og ikkje minst vidareutvikling av velferdsteknologi.
I Giske ser vi også at det å ha mange barn, og mange med utfordringar, er lik eller meir krevande økonomisk enn å tilrettelegge tenester for eldre.
Bustadutbygging
Den nyleg godkjente arealplanen (juni 2018) legg føringar for ei stor bustadutbygging i kommunen. Vi har likevel registrert at utbygginga ikkje har tatt laust slik vi trudde. På plansida er det derimot stor aktivitet, og dette kan syne at utbygginga kan få ei opptrapping mot slutten av økonomiplanperioden.
Vi vil i økonomiplanperioden arbeide vidare for å klargjere kommunal eigedom for sal. Vi skal selge unna bustadar og andre bygningar vi ikkje brukar, og vi skal selge unna tomter vi ikkje treng til kommunal infrastruktur. Hovudregelen er at eigedom skal regulerast ferdig for sal og seljast til marknadspris.
Giske skal igjen ta i bruk verktøyet «utbyggingsavtale» for å få fortgang i bustad- og næringsutviklinga. Det vil seie at private som ønsker å bygge ut bustadområde, etter avtale med kommunen kan bygge ut teknisk infrastruktur for eiga rekning og overlevere tekniske anlegg til kommunen når dei er ferdig utbygde.
Næringsutvikling
Giske er blant dei 5. største fiskerikommunar i landet. Gjøsund, mellom Vigra og Valderøya, er prioritert satsingsområde for næringsutvikling med eit 30-tals bedrifter og 500 tilsette. Fiskerinæringa og leverandørar har ca 3 mia kroner i omsetning. Gjøsund nasjonale fiskerihamn er prioritert utbyggingsområde i Nasjonal Transportplan (TNP) 2018-29, og kommunen har signert avtale med Kystverket om forskottering av inntil 105 mill kroner til mudring av hamna. Det vert opna for nye næringsetableringar på begge sider av sundet, der landområda vert utvida med mudringsmasse og med ny offentleg tungløftkai på Gjøsundneset.